ધનુર્માસ

Date : 23/12/2017

સજની સાંભળો રે, શોભા વર્ણવું તેની તેહ;

મૂર્તિ સંભારતાં રે, મુજને ઊપજ્યો અતિ સનેહ... ૧

પહેર્યા તે સમે રે, હરિએ અંગે અલંકાર;

જેવા (મેં) નીરખિયા રે, તેવા વર્ણવું કરીને પ્યાર... ૨

બરાસ કપૂરના રે, પહેર્યા હૈડે સુંદર હાર;

તોરા પાઘમાં રે, તે પર મધુકર કરે ગુંજાર... ૩

બાજૂ બેરખા રે, બાંયે કપૂરના શોભિત;

કડાં કપૂરનાં રે, જોતાં ચોરે સૌનાં ચિત્ત... ૪

સર્વે અંગમાં રે, ઊઠે અત્તરની બહુ ફોર;

ચોરે ચિત્તને રે, હસતાં કમળ નયનની કોર... ૫

હસતાં હેતમાં રે, સહુને દેતા સુખ આનંદ;

રસરૂપ મૂર્તિ રે, શ્રી હરિ કેવળ કરુણાકંદ... ૬

અદ્‍ભુત ઉપમા રે, કહેતાં શેષ ન પામે પાર;

ધરીને મૂર્તિ રે, જાણે આવ્યો રસશૃંગાર... ૭

વા’લપ વેણમાં રે, નેણાં કરુણામાં ભરપૂર;

અંગોઅંગમાં રે, જાણે ઉગિયા અગણિત સૂર... ૮

કરતા વાતડી રે, બોલી અમૃત સરખાં વેણ;

પ્રેમાનંદનાં રે, જોતાં તૃપ્ત ન થાયે નેણ... ૯